Master sa Filipino, Western Mindanao State University, Lungsod Zambonga Pebrero 1996

Layunin ng pag-aaral na tasáhin ang bisa ng wikang Filipino sa mga asignaturang itinakda ng Patakarang Edukasyong Bilingguwal tulad ng Edukasyong Pangkatawan, Pangkalusugan, Musika, Araling Panlipunan at Edukasyong Pagpapahalaga at ang saloobin ng mga guro sa ipinatupad ng Patakarang Edukasyong Bilingguwal. Kinabibilangan ng 400 na respondenteng mag-aaral sa Mataas na Paaralan sa urban at rural kasama ang Pribadong Sekretaryan at Di-Sekretaryan kasama ang 60 guro na nagtuturo ng limang asignaturang Filipino na itinakda ng Patakarang Edukasyong Bilingguwal ang tumugon sa talatanungan. Natuklasan sa pag-aaral na “mahusay” ang mga mag-aaral na tinuruan ng Filipino sa limang asignatura, nangangahulugan na may mataas na antas ng pagsasagawa at pagkatuto. Batay sa kinabibilangang Paaralan, publiko man o pribado ay mataas ang pagkatuto ng mga mag-aaral sa wikang Filipino. Samantala, anuman ang unang wikang ginagamit ng mga mag-aaral (Sebwano, Tausug, Chabacano) ay nagtamo ng mahusay na pagkatuto at pang-unawa sa limang asignatura na ang gamit na panturo ay Filipino. Sang-ayon ang saloobin ng mga guro hinggil sa implementasyon ng Edukasyong Bilingguwal at mahusay nilang naituturo ang limang asignatura sa wikang Filipino. Pinatutunayan din sa pag-aaral ni Frando na ang 60 na mga gurong nagtuturo, sa kabila ng kanilang digring natapos ay naipamalas ang kanilang mga kakayahan sa pagtuturo ng limang asignatura sa wikang Filipino. Iminumungkahi na magpatupad ng karagdagang asignatura sang-ayon sa patakaran ng Edukasyong Bilingguwal na maituro ito sa wikang Filipino.

Edukasyon