Unibersidad ng Pilipinas, Diliman, Lungsod Quezon 1999

Layunin ng pag-aaral na makapaghain ng mga panukala tungo sa pagsasateorya ng Pagpaplanong Pangwika (PP) mula sa mga tinipong panukalang batas na inihain at tinalakay sa ikawalo at ikasiyam na Kongreso sa pamamagitan ng pagsusuri sa mga puna at mungkahi ng mga kongresista. Nagsilbing sandigan ng pag-aaral ang mga teoryang Policy Approach na halaw kina Rubin at Jernudd (1971) na ang PP ay isang politikal at administratibong gawain para kalutasan ng anomang suliranin tungkol sa wika. Gayundin ang Paraang Unibersal o Universals Approach ni Constantino (1974) na nagsasabing maaaring makalinang o makabuo ng isang wikang pambansa para sa Pilipinas na ibabatay sa maraming wika. Ginamit sa pag-aaral ang pagmamasid, pagtatanong-tanong, at interbyu. Ibinatay at inalam rin ni Cronico ang Batas Republika 7104 na lumikha sa Komisyon sa Wikang Filipino (KWF) upang maunawaan ang mahalagang papel ng mandato nito sa pagtataguyod ng pambansang wika. Inilahad dito na ang implementasyon ng isang pambansang wika ay palaging sumasailalim sa pagbatikos, oposisyon, at resistance. Natuklasan sa pag-aaral na naabot ng mga mambabatas ang konsepto nina Rubin at Jernudd hinggil sa aktuwal na determinasyon o pagpili, pagbuo ng desisyon, at patakarang pangwika. Nakatulong sa lehislatibong proseso ang inilatag na mga adbokasiya o interbensiyon ng mga organisasyon at sektor na nagkaloob ng kanilang ekspertong pananaw upang mapanatiling matatag ang wikang pambansa.

Lingguwistika