Pamantasang Normal ng Pilipinas-Maynila 2014

Layuning mailarawan ang heograpikong barayti ng Tagalog-Batangas sa ilang piling bayan ng Batangas. Saklaw ng pag-aaral ang paraan ng pagbigkas at talasalitaan; maging impluwensiya ng mga karatig lugar sa pagkakaroon ng barayti ng Tagalog-Batangas; at makabuo ng modelo sa iba pang pag-aaral sa barayti ng wika. Ginamit ang paraan ng talatanungan para pasagutan sa mga guro at mag-aaral na isinailalim din sa video documentation. Nakatulong din sa pangangalap ng datos ang sumusunod: 1.) paghahanda sa pagkuha ng datos, 2.) pagpili sa mga lugar, 3.) pagkuha ng video sa mga kalahok, 4.) pagpapasagot sa talatanungan, 5.) pakikipanayam, 6.) pagtatranskrayb at pagwawasto sa mga datos, at 7.) koding ng mga datos. Natukoy na malaki ang gampanin ng wikang ginagamit sa paraan ng pagbigkas ng mga salita at talasalitaan na ginamit ng mga guro at mag-aaral sa pag-aaral ng barayti ng Tagalog-Batangas. May malaking impluwensiya ang wikang ginagamit ng mga guro at mag-aaral na nagmula sa iba’t ibang kalapit na lugar ng pag-aaral tulad ng Mindoro, Cavite, Quezon at Laguna sa mga guro at mag-aaral sa mga lugar sa Batangas. Napatunayang ang aplikasyon ng teorya ni Giles, ang teorya ng akomodasyon na nagpatunay na ang mga tagapagsalita ng wika ay nag-aangkop ng paraan ng pagbigkas at paggamit ng talasalitaan batay sa layunin na makisama sa kausap, pakikiisa sa gawain at pagpapalawig ng samahan tulad ng nagaganap sa silid-aralan sa pagitan ng mga guro at mag-aaral.

Lingguwistika