Paaralang Gradwado Unibersidad ng Pilipinas, Diliman, Lungsod Quezon 2001

Layunin nitong pag-aaral na matukoy ang barayti ng Filipino ng ilang grupong naninirahan sa siyudad ng Zamboanga mula sa iba’t ibang sektor ng lipunan. Dalawang pamamaraan ang ginamit sa pag-aaral na ito: ang pag-iinterbyu at ang deskriptibong pagsusuri sa mga nakalap na datos. Nagsilbing kalahok sa saliksik ang mga mag-aaral, guro, negosyante sa barter trade, empleado sa opisina, nars, maybahay, manininda, drayber, manggagawa sa piyer, at magsasaka na kinapanayam sa paraang random. Namahagi rin ng 700 talatanungan para sa sarbey sa pitong (7) kolehiyo at unibersidad sa Lungsod Zamboanga. Masusing sinuri ang tugon ng mga kalahok ang ponolohiya ng Chavacano Filipino kabilang ang intonasyon, paraan ng pagbigkas, at paggamit ng impit. Inilarawan din ang morpolohiya ng nabanggit na wika, tendensiya sa paggamit ng mga pandiwa, mga klaster, leksikon, pang-uri, pangatnig, pang-angkop, at ang paraan ng pagbuo ng pangungusap (sintaks). Nalaman sa pag-aaral ang mahalagang papel o kontribusyon ng Chavacano sa pagpapayaman ng Filipino bilang isang pambansang lingua franca.

Lingguwistika